FABRICE MUAMBA ALAZIMIKA KUSTAAFU SOKA LEO AKIFUATA USHAURI ALIOPEWA NA MADAKTARI BINGWA

Fabrice Muamba.....kwaherini wapendwa. Nimelazimika kustaafu na hamtaniona tena uwanjani...!

Fabrice Muamba akimwaga machozi baada ya kusalimia mashabiki kwejnye Uwanja wa Wembley kabla ya mechi ya fainali ya Kombe la FA.

Fabrice Muamba akiwa amelala chini katika siku aliyoanguka ghafla uwanjani na "kufa kwa dakika 78". Picha ya Chini, wachezaji wa Bolton wakionekana kujawa na huzuni kwa kuhofia kuwa labda Muamba ameshafariki dunia huku Gareth Bale (kushoto) akimfariji Jermain Defoe aliyekuwa akilia, akijua kwamba Muamba nd'o basi tena.... lakini jamaa akapona kimiujiza licha ya kuzimika kwa dakika 78!    

Dax McCarty wa New York Red Bulls akiwa na fulana yenye ujumbe wa kumtakia kheri Fabrice Muamba... hapa ni kabla ya mechi ya ligi kuu ya Marekani kati ya Red Bulls na Colorado Rapids iliyochezwa Machi 25 mjini New Jersey..  

Fabrice Muamba akiwajibika uwanjani kabla ya kuanguka ghafla katika mechi yao ya Kombe la FA dhidi ya Tottenham

LONDON, England

KIUNGO Fabrice Muamba amelazimika kustaafu soka kutokana na ushauri wa madaktari, klabu yake ya Bolton Wanderers inayoshiriki Ligi Kuu ya England imesema katika taarifa yake leo.

Muamba, 24, alikuwa ni kama amekufa baada ya moyo wake kusimama ghafla katika mechi yao ya Machi ya Kombe la FA dhidi ya Tottenham Hotspur kwenye Uwanja wa White Hart Lane wakati alipoanguka uwanjani na kuhitaji vifaa maalum vya kuokoa maisha yake.

Moyo wake ulisimama kwa dakika 78 lakini kiungo huyo wa zamani akapona kimiujiza, ikiwa ni baada ya kulazwa kwa wiki nne katika Hospitali ya London.

Muamba alikwenda Ubelgiji wiki iliyopita kufuata ushauri wa kitabibu kutoka kwa mtaalam bingwa wa magonjwa ya moyo, lakini matumaini yake ya kurejea tena uwanjani ili kuendelea na soka yalifutwa.

"Taarifa nilizopata ni wazi kwamba sio zile nilizozitarajia,  na hii inamaanisha kwamba sasa natangaza kustaafu soka la kulipwa," amesema Muamba kupitia tovuti ya klabu yake ya Bolton (www.bwfc.co.uk)

"Tangu nipate matatizo ya moyo na kutolewa hospitali, nimekuwa na matumaini makubwa kwamba siku moja nitaweza kurudi tena uwanjani na kuendelea kuichezea tena Bolton Wanderers.

"Soka nd'o maisha yangu tangu nikiwa mvulana mdogo na mchezo huu umenipatia fursa nyingi sana."

Muamba alihamia London akitokea Jamhuri ya Kidemokrasia ya Kongo wakati akiwa na miaka 11 na amewahi kuzichezea timu za ngazi zote za taifa za vijana za England kuanzia U-16 hado U-21.

Aliwahi pia kuichezea Arsenal, ambako mchezaji mwenzake wa zamani, Robin van Persie alisema kwamba mara zote alikuwa mwenye "sura ya kutabasamu" na pia aliwahi kuichezea Birmingham City.

"Soka limempoteza mtu mwema," amesema kocha wa zamani wa Birmingham, Alex McLeish.

Kocha wa Bolton, Owen Coyle pia alizungumzia namna anavyomkubali Muamba.

"Kila mmoja ameona ni namna gani alivyokuwa mpambanaji ngangari wa kiakili na kimwili.”